Linux Mint

Linux Mint
Linux Mint 22.3 («Zena»). Вокны злева направа: файлавы кіраўнік Nemo, кіраўнік праграм (існуе выключна на Linux Mint), браўзер Firefox.
Распрацоўшчык	Clement Lefebvre і супольнасць
Сямейства АС	Linux
Заснавана на	Ubuntu, Debian
Першы выпуск	27 жніўня 2006
Апошняя версія	Галоўная: 22.3 "Zena" — 13 студзеня 2026 LMDE: 7 "Gigi" — 14 кастрычніка 2025
Падтрымлівае мовы	шматмоўны, у тым ліку беларуская
Падтрымлівае платформы	x86-64
Тып ядра	маналітнае (Linux)
Інтэрфейс	Cinnamon[d], Xfce[d] і MATE[d]
Ліцэнзія	розныя (галоўным чынам GPL)
Стан	актыўны
Рэпазітар зыходнага коду	github.com/linuxmint
Вэб-сайт	www.linuxmint.com
Медыяфайлы на Вікісховішчы

Linux Mint (/ˈliːnʊks ˈmint/, ад англ.: mint — мята) — дыстрыбутыў аперацыйнай сістэмы Linux, створаны на базе дыстрыбутыва Ubuntu (які, у сваю чаргу, быў распрацаваны на базе Debian) і арыентаваны на прастату ўжывання. Графік выпуску выданняў: для галоўнай - не раней аднаго разу ў шэсць месяцаў, для LMDE - ад года да трох.

Linux Mint мае адмысловае асяроддзе працоўнага стала Cinnamon, створанае на базе GNOME 3; таксама даступны версіі, якія выкарыстоўваюць MATE і Xfce. Камплектацыя праграмнага забеспячэння ўлічвае патрэбы сервераў, рабочых станцый, персанальных камп’ютараў.

Стандартная ўстаноўка ўключае толькі свабоднае праграмнае забеспячэнне з магчымасцю дадаткова ўсталяваць прапрыетарныя драйверы і кодэкі, а таксама набор праграм для рэдагавання дакументаў (LibreOffice), работы з торэнт-трэкерамі (Transmission), вэб-браўзер Mozilla Firefox, паштовы кліент Mozilla Thunderbird і іншыя.

Для версіі Linux Mint 22.3 з любым стандартным асяроддзем працоўнага стала:

• 2 Гб аператыўнай памяці (рэкамендуецца 4 Гб);
• 20 Гб (рэкамендуецца 100 Гб) памяці на цвёрдым дыску;
• экран з расшырэннем 1024×768;
• CD або DVD-дыскавод або USB-порт для ўстаноўкі сістэмы;
• пажадана: доступ да Інтэрнэту.