Edwin Sutherland

Edwin Hardin Sutherland (13 Augustus 1883 – 11 Oktober 1950) was 'n Amerikaanse sosioloog en een van die invloedrykste kriminoloë van die 20ste eeu. Hy het in 1913 sy Ph.D.-graad in sosiologie en politieke ekonomie aan die Universiteit van Chicago verwerf en was later, van 1935 tot 1950, hoof van die departement sosiologie aan die Universiteit van Indiana.

Sutherland het aangevoer dat kriminele gedrag nié biologies van aard is, of tot tekortkominge beperk is wat spesifiek met die laer sosiale klasse geassosieer word nie. Dit word eerder deur middel van sosiale interaksies en intieme verhoudings (soos met familie en goeie vriende) aangeleer, waardeur individue eerstens die tegnieke aanleer om die wet te oortree, en dan die houdings of rasionaliserings aanleer wat sulke gedrag ondersteun.

In sy presidensiële toespraak in 1939 voor die Amerikaanse Sosiologiese Vereniging (ASA) het Sutherland die term "witboordjiemisdaad" geskep. Hy het die aanname uitgedaag dat misdaad 'n verskynsel is wat uitsluitlik met die laer sosiale klasse en straatmisdaad verband hou; hy het aangetoon dat gerespekteerde individue met 'n hoë status, sowel as korporasies, ook op groot skaal finansiële misdade en bedrieglike dade pleeg.

Hy was die outeur van Criminology (1924, en later getiteld Principles of Criminology), 'n baanbrekende en sistematiese handboek wat gehelp het om kriminologie as 'n wetenskaplike dissipline te vestig.