Parasyte(寄生獣,Kiseijū?) é unha serie de mangaseinen escrita e ilustrada por Hitoshi Iwaaki. Foi publicada pola editorial Kodansha, primeiro na revista Morning Open Zōkan (1989) e despois na revista mensual Monthly Afternoon (de 1989 a 1994).[1][2] A historia céntrase en Shinichi Izumi, un estudante de instituto que é vítima do intento fallado dun organismo parasito de apoderarse do seu cerebro. O parasito, chamado Migi, infecta en troques o seu brazo dereito, e ambos vense obrigados a formar unha peculiar alianza para loitar contra outros parasitos.
Kodansha recolleu os 64 capítulos da serie en dez volumes tankōbon, publicados entre o 23 de xullo de 1990 e o 23 de marzo de 1995,[2] e foi reeditada en oito volumes kanzenban en 2003. En agosto de 2022 o manga tiña máis de 25 millóns de copias en circulación,[3] o que a converte nunha das series de manga máis vendidas de tódolos tempos. En 1993 recibiu o 17º Premio de Manga Kodansha na categoría xeral,[4] e en 1996 o 27º Premio Seiun ó mellor manga.[5]
Shinichi Izumi é un estudante de 17 anos que vive cos seus pais nun barrio tranquilo de Fukuyama, na prefectura de Hiroshima. Unha noite, uns pequenos alieníxenas vermiformes con cabezas en forma de broca, chamados parasitos, chegan á Terra e apodéranse dos cerebros dos seus hóspedes entrando polos seus oídos ou narinas. Un deles intenta introducirse no nariz de Shinichi mentres durme, pero fracasa ó espertar este, e entra no seu corpo a través do brazo. O parasito apodérase da súa man dereita e recibe o nome de Migi, da palabra xaponesa para «dereita». Como Shinichi conseguiu evitar que Migi chegase ó seu cerebro, ambos conservan os seus intelectos e personalidades separadas. Cando se atopan con outros parasitos, que devoran ós membros da especie que infectan, forman gradualmente un forte vínculo e traballan xuntos para sobrevivir. A serie explora cuestións filosóficas e psicolóxicas como o significado da humanidade, a relación dos seres humanos co medio ambiente e outras especies, o papel do instinto e do amor, e o antropocentrismo da moral.
Un manga derivado, Parasyte Reversi(寄生獣リバーシ,Kiseijū Ribāshi?), escrito e ilustrado por Moare Ohta, publicouse na aplicación Comic Days de Kodansha entre o 2 de marzo de 2018 e o 7 de maio de 2021, e recolleuse en oito volumes.[10]
