Colonialisme

Colonialisme es li practica de ocupar e explotar foren territorias pro economic e strategic causes por dominar li territoria e su population. It implica anc li subjugation, assasination o expulsion del local population per un extern state o fortie. Frequentmen li colonistes pensa que ili es culturalmen o mem pro su rasse superiori al local population.

It es tipical por li colonialisme que li conquestat territorias ne es anexat, ma recive li statu de un colonia, quel ne have li sam yures quam li land del colonistes. Quelvez li conquestant popul colonisa li ocupat territorias per homes del dominant state, qui transloca a colonias por dominar li local population. Li nativ population es quelcvez mem extintet, assimilat per violentie o expulset. Frequentmen li subjugat population havet li statu de sclaves e devet servir li colonialistes.

Li colonialisme del Europan states in Africa, Asia, Oceania e America evenit inter li 15-im til li 20-im secul. In li annu 1800 35 percentes del area mundal esset ja colonias e in li annu 1914 it esset mem 84 percentes del area mundal. Li colonialistes ne esset solmen states, ma anc grand economic firmas, queles esset ligat al guvernamentes.

In omni colonias esset resistentie contra li colonistes. E desde li 18-im secul plu e plu colonias successat liberar se del colonialist states. Ti developament porta li nómine de decolonialisation. Pos li fine del Duesim Guerre Mundal li colonial imperies del Reyatu Unit e Francia dissoluet se per li successe del sovent anc violent movementes por li liberation.

• Osterhammel, Jürgen: Kolonialismus: Geschichte, Formen, Folgen (Colonialisme: Historie, Formes, Consequenties). Wissen Beck, 9. actualisat edition, München 2021.