Government

A government is the seestem or group o fowk that leads a state.^[1][2][3] It rules ower a territory, sic as a kintra, a state or province athin a kintra, or a region, accordin tae the law. Governments hae come in monie forms, whether rin bi ae body (autocracy), a sma rulin cless (oligarchy), or the mass o the fowk (democracy).^[3]

Governments ordinarly:

• mak laws, rules an regulations, gaither taxes an prent siller;
• rin seestems o juistice that set oot whit acts are against the law an the punishment for brakkin it;
• keep polis forces tae mak siccar that fowk follae the law;
• send diplomats tae spik wi the governments o ither kintras, tae redd problems an argiments, help kintras keep oot o war, mak trade agreements, an swap cultural an social experiences an knawledge;
• keep militar forces sic as an airmy, that defend the kintra gin ither kintras attack it, or that can be uised tae attack an invade ither kintras.

The leader o a government an thair advisers can be cried thegither the admeenistration.

The main types o modren poleetical seestem are democracies, totalitarian regimes an authoritarian regimes, wi a wheen o hybrid regimes an some exceptions, sic as monarchies that keep auld forms o tradeetional legitimacy.^[4][5]

Democracy

• The maist common form in the Wastren warld is democracy. In a democracy, aw the citizens o a kintra can vote in elections for the representatives or poleetical pairty thay think best. The fowk can elect representatives that sit in a legislatur, sic as a pairliament or a congress. Poleetical pairties are organisations o fowk that hae similar ideas aboot hou a kintra or region shoud be rin, an different pairties hae different ideas aboot hou the government shoud deal wi problems. In a constitutional democracy, the pouers o the majority are uised athin representative democracy, but the constitution limits majority rule, ordinarly bi giein aw fowk certain richts, sic as freedom o speech or freedom o association.^[6]

Monarchy

• A monarchy is a government rin bi a king or a queen that heirs thair poseetion frae thair faimily, aften cried the "royal faimily". There are twa kinds o monarchy: absolute monarchies an constitutional monarchies. In an absolute monarchy, the ruler haes nae limits on thair commands or pouers. In a constitutional monarchy, the ruler's pouers are limitit bi a document cried a constitution.

Autocracy

• An autocracy is a seestem o government whaur the supreme pouer is in the hauns o ae body, that's decisions are subject naither tae ootside legal limits nor tae ony regular weys for the fowk tae control them (except mebbe the threat o a coup or a rising).^[7] Absolute monarchy is a form o autocracy that wis common in history. Ither forms o autocracy include tyranny, despotism an dictatorship.

Aristocracy

• Aristocracy (frae the Greek aristos, "excellent", an kratos, "pouer") is a form o government that pits pouer in the hauns o a sma rulin cless, sic as a heritable nobility or a privileged caste. Monie monarchies war aristocracies, tho in modren constitutional monarchies the monarch micht hae little real pouer. The term aristocracy coud refer an aw tae the classes in feudalism that war naither peasants, servants nor toonsfowk.^[8]

Dictatorship

• Unner a dictatorship, the government is rin bi ae body that haes absolute pouer ower the fowk in a kintra. At first, the Roman Republic appointit dictators tae lead in times o war. The Roman dictators (an the Greek tyrants) warna aye ill, an the Roman dictators held pouer for a limitit time only. In modren times, a dictator's rule isna limitit bi ony laws, constitutions or ither social an poleetical institutions. Efter the Seicont Warld War, monie governments in Laitin Americae, Asie an Africae war rin bi dictators. Ensaumples o dictators include Idi Amin, Muammar Gaddafi an Gamal Abdel Nasser.

Oligarchy

• An oligarchy is a government rin bi a sma group o pouerfu fowk. Thir fowk micht share pouer equally or no. An oligarchy is different frae a true democracy acause gey few fowk get the chance tae chynge things. An oligarchy disna hae tae be heritable, passed doun frae faither tae son, an it disna hae ae clear ruler, but several pouerfu fowk.

Naebody kens whan or whaur human government first stairtit, but history records the formation o early governments. Ane o the reasons gien for the rise o governments is agricultur. Syne the Neolithic Revolution, fermin haes been an efficient wey tae grow mair fuid nor fowk need. That let fowk tak on wark that wisna fermin, an some o them coud rule ower ithers as an ootside authority. Ithers tried oot different weys o rinnin society. Baith thir activities laid the foonds o government.^[9]

The simplest idea o government is them that rule ower fowk an laund. This micht be as sma as a commonty wi a board that luiks efter the affairs o thaim that bide in it, or something a bit bigger lik a clachan, or as muckle as a continent (lik Australie).

Thaim that rule the laund can let ithers awn it. It is a deed bi a government that gies this richt, in the wey the laws set oot. Some fowk think thay hae the richt tae haud laund withoot the government's leave; this view is cried libertarianism. Ithers think thay can dae this thegither as a group, gin thay bide in peace, withoot a government; this view is cried anarchism.

Maist ilka pairt o the Yird belangs tae ae government an ae government only. The places withoot a government are places whaur fowk follae tradeetion insteid o government rules, sma disputit areas, an the continent o Antarcticae, whaur haurdly onybody bides. For ilka place on the Yird there is a government that claims sovereignty ower it. Governments o clachans, ceeties, kintras an ither commonties are aw unner the government o the state or province whaur thay are, an then that o the kintra.

Modren governments an nation states come frae kings an feudalism. The caipital o a kintra, for ensaumple, wis whaur the king kept his wealth.

Governments control fowk an decide whit morality tae accept or punish. In monie kintras there are strict rules aboot sex an drogs that are pairt o the law, an fowk that brak them are punished.

Tax is hou government is peyed for in maist kintras. Fowk that buy, sell, import, invest, awn a hoose or laund, or earn siller hae tae pey some o thair siller tae a government.

There are monie theories o hou best tae organise a government. Acause government is rin bi fowk that can be greedy, monie think leaders shoud be chosen bi some kind o democracy, sae that gin a government disna act richt, it can be replaced at the next election. Still an on, the governments o monie kintras arena democracies but ither forms whaur juist a few fowk hae pouer. Thir theories are pairt o politics.

Wikimedia Commons haes media relatit tae Government.